Payag gihimong pabrika sa mga paltik nga armas

CEBU, Philippines - Usa ka payag nga gihimong buhatan sa mga paltik nga armas de fuego, gironda sa kapolisan didto  sa barangay Lawaan ,siyudad sa Danao sa miaging Martes sa ala 1:30 sa hapon.

Ang kapolisan nakapunit  og nagkalainlaing klase sa ekipo  nga gamiton   sa paggama  og armas sama sa hulmahan  sa kalibre .45 nga armas.

May  mga  kasangkapan  usab nga  mga  de kuryente sama sa electric drill machine, electric grinder.

Unya   lima  ka  mga flat file, screw driver, fliers  ug uban pang mga gamit.

Si SPO2 Ildefonso Prosia, desk officer sa Danao City Police   Station  mibutyag  sa Banat News  nga  nakadawat  sila  og taho bahin sa usa ka payag nga gihimong pabrika sa  mga paltik nga armas sa maong lugar.

Diha-diha  ila  dayong   gironda sa  pagpanguna ni  PO2 Jomar Salomon.

Matud  pa ni SPO2 Prosia nga sa  ilang  pag-abot  sa maong  dapit  nakabantay ang duha ka mga lalaki nga gituohang mga trabahante ug nag-iyahay sa pagpanagan  pahilayo  sa maong  lugar.

Didto gisusi sa kapolisan ang maong payag ug  nadiskobrihan   nila  ang nagkalain-laing klase sa mga  gamit  sa paggama   og armas ingon man  hulmahan  sa paghimo  og kalibre .45 nga revolver.

Walay suspek nga mapasakaan og kaso ang kapolisan tungod  kay  wala  silay  tawo  nga naabtan  niini  ug  walay  mitug-an  nga  mga  tawo  bahin sa ngalan  sa tag-iya sa payag.

Ang siyudad sa Danao  maoy tinubdan sa mga paltik nga armas  dinhi  sa lalawigan. (BANAT NEWS)