Pagbutang og transport bus sa talisay padung Mandaue ok

CEBU, Philippines - Walay pagsupak ang kadagkoan sa City Traffic Operations Management (CITOM) nga tugotan ang pagpadagan og mga bus para pasaheroan gikan sa dakbayan sa Talisay agi sa South Road Properties (SRP) ug lahos na sa North Bus Terminal sa Barangay Subangdaku, Mandaue.

Si Sherry Tuvilla nga maoy general manager sa SM City maoy mipadala og suwat-hangyo ngadto sa kadagkoan sa dakbayan nga irekomendar niini ang pagpadagan og mga bus nga moagi sa SRP.

Klaro kaayo nga ang tinguha ni Tuvilla maoy agi og pagpangandam kun mahuman na ang pagtukod nila og higante nga mall diha sa SRP nga nagpadayon pa sa pag-construct.

Gisugyot ni Tuvilla nga sa dili pa molahos sa north bus terminal ang mga bus nga gikan sa Talisay, mohapit kini sa Mambaling Access Road aron sa pagpasakay og mga pasahero.

Apan si Maricor Encabo sa Project Monitoring Office (PMO) nagkanayon nga adunay problema kun asa og lugar nga ang mga bus makabalik sa SRP ini’g-abot nila sa duol sa Mambaling Flyover nga dili makabalda sa ubang sakyanan.

Gisugyot ni Encabo nga ang karaang Jai-Alai Fronton diha sa dalan C. Padilla himoong private terminal aron anha posible ang mga bus moparking nga magpasakay og pasahero.

Gisugyot usab ni Encabo nga kadtong mga bus nga tugotan nga makabiyahe sa South Coastal Road ngadto na sa Subangdaku, Mandaue kadto lang mga bag-o ug susama na sa gamiton unya sa Bus Rapid Transit.

Gihulagway nga maayo ang tumong nga pagpabiyahe og mga bus diha sa South Coastal Road kay walay masakyan ang mga tawo nga moanha sa SRP.

Matud sa Project Monitoring Office nga dili mahimong itugot ang pagpaagi og mga jeepney nga pasaheroan diha sa South Coastal Road tungod kay adunay ubang motorista nga mihulagway nga kiat kaayo mopadagan ang mga PUJ drivers.  (BANAT NEWS)