Subling inihapay sa balota Wagas labaw ni Quiño

CEBU, Philippines - Usa ra ka presinto ang nadag-an ni Mayor Joel Quiño sa 13 ka clustered precincts nga gimano-mano sa pag-ihap (manual recount) sa Revision Committee sa Regional Trial Court (RTC) Branch 55 sa Mandaue City  sa miaging  semana.

Mao  kini  gibutyag  kagahapon   ni Louie Reyes tigpamaba  ni kanhi  Mayor Richie Wagas sa  Banat News  kinsa  miingon  nga ang pagpang-abli sa mga ballot boxes nga gigamit sa 2010 local election sa Compostela gisugdan niadtong  Marso 21, 2013 ug gipadayon sa Marso 22, 25, 26 , ug 27.

Matud  ni Reyes  nga sa mga balota sa 13 ka mga presinto nga  gisubli sa pag-ihap,  si kanhi Mayor Ritchie Wagas midaug sa 12 ka presinto nga nagpakita og labaw nga 1,287 botos batok ni Quiño. Midugang  siya  nga ang clustered precinct number 7 sa barangay Bagalnga mao ray nadag-an ni Quiño diin milabaw lang siya og 20 botos  kang Wagas.

Sumala ni  Reyes  nga  ang pasiunang resulta sa pag-ihap sa korte  mao  kining  mosunod,  sa precinct 1 ang kang Wagas 288 batok sa 214 ni Quiño;  sa precinct 2, Wagas 268 ug Quiño 191; sa precinct 3, Wagas 286 ug Quiño 132; precinct 4 Wagas 289 ug Quiño 98; precinct 5, Wagas 357  ug Quiño 191;

Sa precinct 6, Wagas 452 ug Quiño 329; precinct 7, Wagas 170 ug Quiño 190; precinct 8, Wagas 185 ug Quiño 118; precinct 9, Wagas 330 ug Quiño 229; precinct 10, Wagas 400 ug Quiño 273; precinct 12, Wagas 277 ug Quiño 163; precinct 13, Wagas 237 ug Quiño 228; precinct 15, Wagas 358 ug Quiño 326.

 Midugang  si  Reyes  nga ang Revision Committee nga gipangulohan ni Atty Tranni Ferrer wala moihap sa precinct 11 human magkasabot ang masig ka habig nga laktawan lang kini. Sa pakighinabi sa Banat News, si Wagas mipasabot nga iyang gigahinan sa iyang panahon ug gigastohan og salapi ang pagkwestyon ngadto sa hukmanan ang dili katuohan niyang kapildihan sa miaging eleksyon.

 "Mao ray akong gustong mapalutaw ang kamatuoran nga gimaniobra ang PCOS sa pagpadaug sa akong kaatbang," pasabot ni Wagas.Sumala  ni  Reyes nga  sa sayo pa,  si  Ferrer namahayag nga malaumon silang makasumitir sa resulta sa revision of ballots  sa dili pa ang court hearing karong Abril 30 ning tuiga. Kahinumdoman nga niadtong Pebrero 28, 2013 pinaagi nila ni Municipal Election Officer Emmanuel Uy ug Municipal Treasurer Cleofe Gonzaga  ang 34 ka mga ballot boxes  sa lungsod sa Compostela ilang gihatod  sa korte subay sa mando ni RTC Branch 55 Judge Estela Alma A. Singco.

Tulo ka semana human mahatod ang 34 ka mga ballot boxes sa korte gisugdan niadtong Marso 21 ang subling pag-ihap sa mga balota. 

 Si  Reyes  nagkanayon  nga  ang pagpadayon sa court hearing gitakdang himuon karong Abril 30, 2013. Sumala  niya  nga  subay sa katapusang iniphanay, si Wagas nakakuha na og 3,897 botos samtang 2,610 botos kang Quiño.

Sa pagka karon milabaw na si Wagas ug 1,287 botos sa 13 ka presinto, dugang  pa  ni Reyes. Gisuwayan  sa Banat News  sa pagkontak  si Mayor Quiño  sa  iyang  cell phone  alang  sa iyang  habig apan  wala  mo-reply. (BANAT NEWS)