Abogado ni Corona maoy gikuha ni Gwen nga modepensa kaniya

CEBU, Philippines - Abogado ni kanhi Supreme Court Chief Justice Renato Corona ang mangulo sa pagdepensa ni Gob. Gwendolyn Garcia atol sa oral argument sa iyang gipangayong temporary restraining order (TRO) sa Court of Appeals karong Enero 10.

Si Atty. Tranquil Salvador III nakigtagbo kang Garcia sa Kapitolyo kagahapon kauban sa mga abogado sa pamilyang Garcia nga sila si Deputy Speaker Pablo Garcia, Kong. Pablo John Garcia ug Atty. Ma. Esperanza Christina Garcia Frasco nga anak sa gobernador.

Human sa ilang tigum, si Salvador mitug-an sa mga tigbalita nga andam na ug lig-on ang ilang argumento sa kaso ni Garcia.

Si Salvador ang abogado ug tigpamaba sa depensa ni Corona atol sa impeachment trial niini sa Senado, nakombikto si Corona sa maong hearings.

Silang Salvador ug Frasco kauban sa Romulo Mabanta Buenaventura Sayoc & De los Angeles law office isip line partner ug associate partner. Atol sa tigum kagahapon, ang mag-amahan nga magbabalaud nga Garcia kinsa parehong abogado ang nihatag usab sa ilang panahom sa kaso samtang si Frasco magpabiling sakop sa legal team.

“I trust my lawyers and I trust the law firm,” matud pang Gob. Garcia.Apan giklaro ni Garcia nga ang pag-ampo ang labing mahinungdanon alang kaniya. Ang kampo sa mga Garcia nikwestiyon sa legalidad sa pagsuspenso sa gobernador bali og unom ka buwan hinungdan nga ila kining gipasaka ngadto sa CA.

Ang Malacañang ang misilot kang Garcia human namatud-ing sad-an sa reklamong administratiba nga gipasaka ni anhing bise gobernador Gregorio Sanchez Jr. niadtong Nobiyembre 8, 2010. Bisan patay na si Sanchez, ang kaso giimbestigar gihapon sa Department of Interior and Local Government.  (BANAT NEWS)