CEBU, Philippines - Di estriktohon sa mga tinugyanan sa Bureau of Customs ang mga atletang langyaw nga mosalmot sa Ironman Philippines Triathlon nga motungha dinhi sa Sugbo agi sa Mactan Cebu International Airport (MCIA).
Matud pa ni Sub-Port Collector Paul Alcazaren sa Mactan nga may giluwatan na siyang mando ngadto sa mga nadestino sa Customs zone sa arrival area sa MCIA kalabot niini.
Nagkanayon si Alcazaren nga ang mga mahalong butang nga dad-on sa mga atleta sama sa biseklita, sapatos ug uban pa nga may labot sa duwa nga ilang salmotan dili kaayo estriktohon ang pagpanghiling niini.
Midugang siya nga ang buhaton sa mga tinugyanan sa Custom mao lang ang pag-imbentaryo sa maong mga butang aron matino nga inigpauli nila mao gihapon kining mga butanga ang ilang dad-on pauli sa ilang tagsa-tagsa ka lugar.
Nasuta usab nga mga 80 porsento na sa l,700 ka atleta sa Ironman miabot na sa MCIA ug anaa na sa ilang tagsa-tagsa ka hotel sa Lapulapu ug dinhi sa dakbayan sa Sugbo.
Ang mga atleta nga gikan sa Manila, Davao , Cagayan de Oro nangabot na usab alang sa maong torneyo. - BANAT NEWS