CEBU, Philippines - Ang upat ka mga polis sa Talamban Police Station kansang gigukod nga suspetsadong tulisan namatay sa mibutong granada nga dala niini niadtong Huwebes didto sa sitio Tigbao, barangay Talamban, dakbayan sa Sugbo, mag-atubang og imbistigasyon.
Kini aron lang sa pagsuta kun wala ba silay nalapas nga balaod bahin sa kamatayon ni Faustino Navarro Jr, 34, nga taga barangay Punay, lungsod sa Aloguinsan.
Hinuon nakadawat sila og pasidungog nga gitunol ni Sr. Supt. Melvin Ramon Buenafe , ang hepe sa Cebu City Police Office .
Ang gipasidunggan mao sila si Chief Insp. Michael Angelo Beltran ,hepe sa Talamban Police Station ug ang tulo niini ka mga sakop nga sila si SPO4 Bundio Cabahug; SPO2 Valintino Guevarra ug PO2 Neal Lavesares.
Kagahapon sa buntag magpaubos unta sa paraffin test ang upat ka mga polis apan ang Crime Laboratory mipasabot kanila nga dili na mahimo tungod kay milapas na og 72 oras ang hitabo gikan niadtong Huwebes.
Si Navarro gigukod sa maong mga polis human kini ialarma nga armado sa mga molupyo sa Talamban niadtong Huwebes
Dihang na-corner kini mikuot sa granada gikan sa iyang bulsa apan dihang ilabay na unta niya kini ngadto sa mga polis nga migukod kaniya, mibuto ang maong granada.
Busa namatay siya nga samdan ang tampihak, nabungkag ang wala niyang kamot ug nababha ang wala niyang paa. Ang upat ka polis nga maoy migukod kang Navarro mag-atubang pa og imbistigasyon ug gani ila nang gipaubos sa ballistic examination ang ilang mga armas aron lang masuta nga wala nila hilabti ang biktima.( /WC) - BANAT NEWS