CEBU, Philippines - Usa ka wanted criminal didto sa Zamboanga del Sur nadakpan sa kapolisan didto sa lungsod sa Barili, ning lalawigan sa Sugbo kagahapon sa udto.
Ang nadakpan mao si Genovevo Gemilian, 44, usa ka barangay tanod sa Luhod, lungsod sa Barili.
Wala makalihok si Gemilian dihang gisilbi ang warrant of arrest kaniya sa mga sakop sa Criminal Investigation and Detection Group nga gipangulohan ni Chief Insp. Fermin Armendarez. Ang orden de aresto giluwatan ni Regional Trial Court Judge Edilberto Absin sa San Miguel, Zamboanga del Sur.
Uban sa pagkasikop ni Gemilian ang iyang .38 kalibre nga revolver. Gipaslak siya sa prisohan sa Barili samtang gihikay na ang pagpadala kaniya ngadto sa Zamboanga del Sur. (Rey Pasaporte/WC) (BANAT)