CEBU, Philippines - Gisakmit sa Bureau of Customs kagahapon ang kapin sa 700,000 ka blankong Digital Video Discs (DVD) nga gibanabanang mokantidad og P6 milyones subay sa kamandoan ni Customs Commissioner Ruffy Biazon.
Si Biazon personal nga misusi sa operasyon.
Ang consignee sa maong kargamento mao ang ZAKCHRIS General Merchandise sa Mabolo, Cebu City kinsa girekomendar ni Biazon nga pakasohan sanglit ang pag-import og rewritable optical media discs kinahanglang adunay permiso o import permit gikan sa Optical Media Board (OMB).
Matud pa nasakpan kini dihang gipaagi sa Customs X-Ray Inspection ang kargamento ug mga papeles sa importer.
Si Atty. Lourdes Mangaoang, ang national head sa BOC X-Ray Inspection (XIP) Project, miingon nga gibutang sa usa ka 20-foot container van ang maong kargamento dihang miabot sa pantalan sa Sugbu niadtong Marso 6 luwan sa usa ka Taiwan-flagged M/V Cape Franklin.
Matud pa ni Mangaoang, sa press statement nga gipadala nga ang import permit nga gisumitir sa ZAKCHRIS General Merchandise peke base sa gihatag nga sertipikasyon gikan ni OMB chairman ug chief executive officer Ronnie Ricketts.
Sumala pa ni Biazon tungod sa pagsuway og palusot mawala sa consignee ang maong kargamento ug hayan matangtang kini sa listahan sa mga accredited importers ug mapasakaan pa og kasong kriminal.
Si Cebu District Port Collector Ronnie Silvestre kinsa inisyal nga mipagawas sa Warrant of Seizure and Detention sa maong kargamento mipasidaan sa mga importers nga di gamiton ang Sugbo sa pagpalusot og kontrabando. (BANATNEWS)