Publiko gipahimangnoan sa CIDG bahin sa paggamit og credit cards

CEBU, Philippines - Human nasikop sa Criminal Investigation and Detection Group (CIDG)-7 ang Cebu- based hacker sa mga credit cards, daling mipahimangno si Sr. Supt. Jose Pante ngadto sa publiko nga kinahanglan magmabinantayon sa ilang pag-apply ug dili magpasagad paggamit sa ilang mga credit cards.

Giluwatan kining maong pamahayag ni Pante atol sa press conference kagahapon human laing usa ka doktor nga taga dakbayan sa Lapulapu ang midangop sa ilang buhatan niadtong Domingo ug mitug-an nga daw nabiktima usab siya sa hacker kay nahibulong siya nga miabot og kapin sa P60 mil ang iyang bayranan sa bangko bisan og wala niya gamita ang iyang credit card.

Sa miaging semana si Dr. Wilson Dela Calzada nga taga Minglanilla ug nag-alagad sa usa ka inila ug pribadong tambalanan dinhi sa dakbayan ang midangop sa CIDG-7 human iyang nadiskobrehan ang kadudahang pagtaas sa iyang bayranan sa iyang credit card nga miabot og kapin sa P70 mil nga gigamit sa pagpalit og ticket sa eroplano nga unta wala man kini niya gamita sa pagpamalit.

Sa gihimong entrapment operation sa CIDG pinangulohan ni Chief Insp. Fermin Armendares, nasikop nila si Jerwin Minglanilla nga taga dakbayan sa Talisay, gradwado sa Bachelor of Science in Information Technology (BSIT) sa usa ka inilang unibersidad dinhi sa dakbayan sa Sugbu.

Nasulod sa laang sa mga sakop sa CIDG si Minglanilla dihang nakig-alayon ang mga pasahero nga iyang gibaligyaan sa mas ubos nga presyo sa tiket diha sa barangay Tisa ning dakbayan.

Matud ni Pante nga mitug-an kanila si Minglanilla nga anaa siya’y kakunsabo nga usa ka credit card agent nga maoy mohatag kaniya og mga impormasyon sa ilang biktimahon.

Si Armendares nga nahinabi usab sa mga tigbalita nagkanayon nga pinaagi sa credit card information nga ilang makuha, mopahigayon si Minglanilla og trial and error pinaagi sa internet hangtud nga iyang ma-hack ang credit card ug gamiton niya kini.

Gidugang usab ni Armendares nga gawas sa pag-hack sa credit cards giingong manghimo usab og peke nga Identification Card (I.D) ang suspek aron iyang gamiton sa ilegal nga transaksyon.

Tungod niini, nagtuo si Pante nga duna pay laing kauban si Minglanilla nga ilaha na karong gisubay. (BANATNEWS)