CEBU, Philippines - Ang mga konsehal sa dakbayan sa Talisay mihangyo sa Cebu Provincial Police Office (CPPO), Police Regional Office (PRO)-7 ug sa Camp Crame nga lugwayan pa si OIC Chief Eddie Recamara sa Talisay City Police Station (TCPS) aron ikapadayon niya ang nasugdan niyang gimbuhaton sa pagmintenar sa kalinaw ug kahusay sa maong dakbayan.
Si Bise Mayor Alan Bucao, chairman sa peace and order council committee sa pakighinabi sa Banat News kagahapon mibutyag nga ang mga sakop sa konseho gawas kanila ni Konsehal Romeo Villarante, Danny Caballero ug Val Ylanan gipatawag ni Mayor Socrates Fernandez ug gihisgotan nila ang maong butang.
Gibutyag ni Bucao nga mihangyo kanila si mayor Fernandez nga pirmahan ang suwat-hangyo nga magpabilin si Recamara isip OIC sa Talisay police.
Matud ni Bucao si mayor Fernandez mipasabot kanila may nahimo nang kaayohan si Recamara sa ilang dakbayan ug usa niini mao ang pagkasikop ni Noel Simbajon alyas "Noel Pacaña" kinsa suspetsado sa pagpusil patay kang PO1 William Mangubat Jr.
Buot sa mayor nga hatagan og lugway ang pagdumala ni Recamara sa TCPS aron maimplementar ang mga giplano niining pagpalambo sa kwerpo sa kapolisan sa siyudad.
Apan ang problema niini kay si Recamara dili man kalipikado sa pagka-hepe tungod kay Chief Inspector ra man ang iyang rango samtang ang kalipikasyon sa usa ka hepe sa kapolisan mao man ang Colonel o Superintendent, matud ni Bucao.
Hinuon kun may i-indorsong hepe sa Talisay, ang mayor ra man ang may katungod sa pagpili niini busa, dako og purohan nga mosaler ang pagpabilin ni Recamara sa iyang katungdanan isip OIC nga hepe sa kapolisan sa Talisay.
Samtang si Recamara nga nahinabi sa Banat News kagahapon nagpasalamat sa mga opisyal sa Talisay kinsa misalig kaniya ug gipasalig niya nga iyang doblihon ang paningkamot sa pagpatuman sa kahapsay ug kalinaw sa Talisay aron dili mapakyas ang pagsalig kaniya sa mga lider sa dakbayan.
Si Recamara milingkod isip OIC nga hepe sa TCPS niadtong Mayo 2, 2011 ug gipaabot niyang mahimo na siyang Colonel karong sunod buwan. - BANAT NEWS