CEBU, Philippines - Naangol ang inahan ug anak dihang ang motorsiklo nga ilang giluwanan kalit lang nasaghid sa nagginukdanay nga prime mover truck sa dalan M.C. Briones sa barangay Maguikay, dakbayan sa Mandaue sa miaging gabii.
Ang mga naangol mao sila si Rosalito Pondon Celenio, 30-anyos ug inahan niini nga si Lucina Celenio, 53, mga taga Upper Yati, lungsod sa Liloan.
Si PO2 Rocelo Campo sa traffic section sa Mandaue City Police Office (MCPO) miingon nga kusog nga nagdagan ang duha ka prime mover truck nga gimaneho nila ni Ronald Cataluna Rondina, 30, ug William Mabuang Maldo, 43, pulos taga barangay Subangdaku sa maong dakbayan.
Gitanggong karon sa sulod sa detention cell sa presento 1 sa Centro Police Station sa MCPO ang duha ka mga drayber kinsa boluntaryo usab nga mitahan ngadto sa kapolisan sa maong dakbayan.
Dugang pa ni PO2 Campo nga pulos gikan sa amihanang bahin sa lalawigan ang duha ka prime mover ug paghidangat sa maong dapit kalit lamang kining nagkasaghid.
Ang motorsiklo nga paingon sa lungsod sa Lilo-an kalit lang nga nadagit sa duha ka prime mover hinungdan sa pagkalamba ngadto sa sementadong karsada sa motorsiklo nga giluwanan sa mga biktima.
Ang duha ka biktima unang gidala sa Mandaue City District Hospital apan human sa pasiunang pagtambal gibalhin kini ngadto sa Vicente Sotto Memorial Medical Center sa dakbayan sa Sugbo. (BANAT NEWS)