CEBU, Philippines - Misaka og 300 mil ang gidaghanon sa mga tinun-an sa publikong tunghaan dinhi sa Sugbo ug tibuok Central Visayas karong subling nagbukas ang klase sugod kagahapong adlawa.
Atol sa pagbukas og balik sa klase si Department of Education DepEd-7 Acting regional director Carmelita Dolangon mipadayag dihang nahinabi sa Banat News nga personal niyang gisusi ang pipila ka mga dagkong tunghaan dinhi sa dakbayan kagahapon pagtino sa sitwasyon niini.
Gitug-an ni Dolangon nga tungod sa pagsaka sa gidaghanon sa mga mipa-enroll sa mga publikong tunghaan karung tuiga dunay mga tunghaan nga napugos pagpahigayon og double shiftings.
Usa ka klase sa buntag ug laing usa ka klase sa hapon matag tunghaan aron pagsulbad sa kakuwang sa mga lawak saringan.
Gitumbok ni Dolangon ang Lahug Elementary School dinhi sa dakbayan sa Sugbo ug ang Marigondon Elementary School sa dakbayan sa Lapulapu gumikan sa kakuwang sa lawak saringan.
Matud ni Dolangon nga wala pa hinuon silay kompletong figure sa gidaghanon sa mga enrollees karung tuiga dinhi sa rehiyon tungod kay padayun pang gitapok sa mga principal ug division heads ang ilang report kagahapong adlawa.
Apan matud ni Dolangon sa ilang projection moabot ngadto sa 1.5 milyones ang gidaghanon sa mga nagpa-enroll sa mga tinun-an sa pangpublikong tunghaan dinhi sa Central Visayas ug kini mas taas og 300 mil itandi sa nakalabay’ng tuig nga moabot lang og 1.2 milyones.
Dugang ni Dolangon nga gipaabot nga matubag usab ang pagkuwang sa mga magtutudlo dinhi sa rehiyon gumikan kay dunay 953 ka mga bag-ong items nga gi-aprobahan alang dinhi sa Central Visayas karung tuiga aron i-apud apod sa lain laing dibisyon.
Giangkon sab ni Dolangon nga wala gyud nila matuman karun ang ratio nga usa ka magtutudlo sa matag 40 ka tinun-an sa usa ka lawak. Kini gumikan sa kadaghan sa mga tinun-ang gikan sa pribadong mga tunghaan nga mibalhin karon sa mga public schools. (BANAT NEWS)