CEBU, Philippines - Patay ang 72-anyos nga amahan human kini gi-unay og tigbas sa kaugalingong anak atol sa ilang panag-away dihang nangahubog na sa ilang pag-inum og tuba didto sa ilang pinuy-anan sa barangay Tindog lungsod sa Medillen niadtong Miyerkules sa alas 6:00 sa gabii.
Ang biktima mao si Dulcisimo Aresga, 72, molupyo sa nahisgutang lugar samtang ang gipasanginlang suspek mao ang iyang kaugalingong anak nga si Danilo Aresga, 30.
Matud ni PO1 Renato Nugas, desk officer sa Medillen Police Station dihang nahinabi sa Banat News subay sa imbestigasyon dihang nangahubog ang duha mitumaw ang ilang panaglalis.
Giingong misangpot kini sa init nga sumpaki sa duha ug dihadiha milakaw ang biktima ug mikuha og pinote ug pagbalik kalit nga gitigbas ang anak.
Apan nakapanagang kini ug naigo gyud ang walang kamot hinungdan nga nakiglayogay kini sa amahan hangtud nga nailog ang hinagiban ug mibawos pagtigbas makaduha ka higayun sa tuong bukton ug ibabaw nga bahin sa paa sa amahan.
Apan gumikan sa kagubot bunga sa maong pagpanigbas wala dayun madala sa tambalanan ang biktima ug uwahi nang nadala sa mga kabanay sa Verallo District Hospital sa Bogo kay nahutdan kini og dugo ug gideklarar patay na pag-abot didto.
Ang anak niini nasikop sa mirespondeng mga polis ug nakuha gikan sa posisyon niini ang pinote nga gibanabanang dunay gitas-on nga 20 ka pulgada.
Ang suspek nagtingkagol na karun sa karsel sa kapulisan samtang gihikay na ang kasong ipasaka niini. (BANAT NEWS)