CEBU, Philippines - Usa ka lalaking gipasanginlang namaligya og ginadiling drugas ang nasikop sa City Intelligence Branch (CIB) atol sa buy bust operation alas-10 sa miaging gabii diha sa barangay Lorega-San Miguel siyudad sa Sugbu.
Si Chief Insp. Romeo Santander, hepe sa CIB sa Cebu City Police Office (CCPO) miila sa suspetsado nga mao si Edgar Areglo, 38, molupyo sa nahisgutang lugar kinsa nakuhaan og lima ka bultong ang sulod gituohang shabu.
Si Santander miingon nga usa ka bultong shabu ang transaksyon sa ilang poseur buyer ngadto kang Areglo gamit ang ‘budol money’ nga ginunting-gunting nga papel diin gipaibabwan lang og usa ka libo nga tinuod nga kwarta.
Human gitunol ni Areglo ang usa ka bulto nga shabu, dali siyang gisikop sa mga awtoridad ug sa dihang girekisa laing upat ka bulto ang nakuha sa iyang posesyon.
Matud ni Santander ang laing upat ka bulto nga shabu posibleng dunay laing transaksyon si Areglo.
Si Areglo sa dihang gikuhaan og reaksyon sa mga sakop sa media samtang anaa kini sulod sa detention cell kusganong mihimakak nga iya kadtong shabu nga nakuha sa CIB.
Apan matud sa kapulisan mao gyud kini kasagaran himuong depensa sa ilang dinakpan ug kun mahimo adto nalang tubagon sa korte.
Kagahapong adlawa giandam na sa CIB ang kasong paghupot og pagpamaligya og ginadiling drugas sa Section 5 ug 11 sa R.A 9165 batok kang Areglo. (/EIM) (BANATNEWS)