CEBU, Philippines - Gimando sa korte nga si SPO1 Adonis Dumpit ipabalhin na gikan sa kostudiya sa Criminal Intelligence and Detection Group-7 human misang-at og petisyon sa korte ang inahan ni Ronron Go niini.
Si RTC-7 Branch 6 Judge Ester Veloso mimando kagahapong adlawa ngadto sa CIDG-7 nga si Dumpit ibalhin na ngadto sa Cebu City Jail sa barangay Kalunasan ning siyudad sa Sugbo.
Ang korte mihatag og gibug-aton sa mosyon nga giduso ni Janeth Badana ang inahan sa biktima nga si Ron Ron Go nga naghangyo sa korte nga ipabalhin og bilanggoan si Dumpit tungod kay nasakpan kini niini niadtong nakalabay’ng semana nga wala sa sulod sa bilanggoan.
Atol sa maong hearing si Veloso nangayo og katin-awan ngadto kang Dumpit pinaagi sa abogado niini nga si Atty. Leslie Salva nganong nakagawas kini sa bilanggoan sa CIDG.
Si Dumpit mitug-an sa korte nga nagpa-medical check up tungod sa kasakit sa iyang tiyan dihang naatol nga mibisita si Badana sa CIDG-7.
Apan wala tuhoi sa huwes ang pagpasabot ni Dumpit hinungdan nga gimando niini ang pagpabalhin kaniya ngadto sa City Jail sugod kagahapong adlawa.
Si Deputy Warden for administration sa Cebu City Jail nga si Sr. Insp. Dennis Aliño sa pakighinabi sa Banat News mikumpirmar nga naa na sa ilang bilanggoan si Dumpit.
Matud pa niya nga dili gyud nila iipon si Dumpit sa mga inmates ug aduna nay selda alang kaniya nga limitado ang makaagi ug mipasalig kining luwas si Dumpit sa maong selda.
Sumala pa ni Aliño nga pag-abot ni Dumpit diha sa Cebu City Jail kagahapon daw ‘nagpiyesta’ ang mga inmates tungod sa kabanha. Matud pa niya nga adunay mga negatibo ug positibong ilang nadunggan gikan sa mga bilanggo.
Si Dumpit gikunsiderar nga ‘high risk’ inmate tungod sa kaaktibo niini kontra mga kriminal ug ang uban sa iyang mga dinakpan naa sa maong bilanggoan. (EIM) (BANAT NEWS)