CEBU, Philippines - Mitiyabaw na ang Central Visayas Pork Producers (CVPP) sa padayong pagsulod sa mga imported nga mga karne sa lokal nga kamerkaduhan tungod kay naapektahan ang ilang kinitaan ug nabalakang hasta ang ubang nagsalig sa pamuhi og baboy mawad-an na og panginabuhian.
Si Rolando Tambago, presidente sa CVPP mibutyag sa mga tigbalita nga silang mga local pork suppliers karon ang naigo og maayo sanglit dili nila kayang makig-apasay sa presyo sa mga imported nga karneng gipamaligya lang sa baratong presyo.
“Naigo gyud mi sa problema because sa massive importation,” matud pa niya.
Giawhag sa CVPP ang mga konsumidor nga ang lokal nga karneng baboy maoy paliton sanglit dako kini og matabang sa lokal nga namuhi og baboy ug ingon man ang ubang sektor nga nagsalig niini.
Tungod sa sitwasyon karon daghan nang mga namuhi og baboy ang gikabalak-an nilang mohunong na niini sanglit mahal na ang lawog unya barato pang paliton sa mga merkado sanglit aduna may imported nga karneng mas barato sad.
Matud pang Tambago dinhi sa ato ang lokal nga namuhi og baboy walay suportang nakuha gikan sa gobiyerno dili pareho sa mga hog raisers sa ubang nasud nga kompleto ang suporta sa ilang gobiyerno.
Nabalaka siyang karong bulan sa Hunyo wala nay mamuhi og baboy dinhi sa Kabisay-an tungod sa kabarato na niini.
Ang CVPP adunay 30 ka mga sakop nga hog farms sa tibuok Central Visayas nga adunay kapin sa 100 mil ka pamilyang nagsalig niini.
Wala pay labot niini ang apektadong feed producers ingon man ang mga trabahante niini ug ang mga mag-uuma og mais nga maoy gamiton sa paghimo og lawog sa baboy nga gihulagway sa CVPP nga ‘domino effect.’
Samtang gihimakak niya ug mihulagway nga malisyoso kaayo ang gipagawas nga pamahayag sa nangangkong food technologist nga usa ka Mario Montes sa pagpagawas niini og pamahayag nga positibo sa E. Coli bacteria ang lokal nga mga karneng baboy gikan sa Carbon Market ug Mandaue City Public Market.
Matud pang Tambago nga dili makiangayon ang maong pamahayag sanglit wala man makasiguro kun independente ba gyud siya sa iyang gihimong laboratory test ug nagduda silang posibleng ginama-gama ra usab kini sa pundok sa mga imported meat dealers.
“Naa bay presko nga hugaw? When in fact ang frozen meat moabot tag 18 months nga frozen ang ubang imported nga karne,” matud pang Tambago kinsa midugang nga tungod niini inig katunaw sa ice mangluspad na ug dangog ang imported nga karne.
Samtang laing opisyal sa CVPP nga si Dennis Rodolfo miingon nga garantisadong luwas ang ilang mga baboy gikan sa sakit sanglit inspeksyunon kini sa meat inspectors sa mga abattoir o ihawan sa buhi pa ug human na ihawa una pa kini ibiyahe ngadto sa kamerkaduhan.
Sumala pa niya posibleng adunay mga imported nga karne nga nakasulod dinhi nga mga ‘reject’ o ‘junk’ na sa kamerkaduhan sa ubang nasud sanglit sagad sa mga langyaw purong karne o maayong parte sa baboy ra gyud ang ilang kan-on ug dili mga liog sa baboy, tiil, ulo ug uban pang wala nila kinahanglana maoy ipadala dinhi. - BANAT NEWS