CEBU, Philippines - Duha ka mga batang babaye na ang namatay sa outbreak sa pagsuka-kalibang sa kapin 200 ka mga nabiktima niini gikan sa upat ka barangay sa dakbayan sa Danao.
Ang biktima nga kapin pa sa usa ka tuig nga taga barangay Taytay nga nailhan lang sa apelyedo nga ‘Pantoja’ kinsa namatay kagahapon sa buntag ug ang siyam ka buwan nga batang babaye nga si Princess Niña Adriano nga taga barangay Taboc.
Niadtong Sabado sa buntag namatay si Adriano didto sa Siquijor kini human siya gidala sa iyang ginikanan aron unta magbakasyon apan nianang pagkabuntag sa Sabado nakabsan kini sa kinabuhi human maigo sa diarrhea sa dihang diha pa sila sa syudad sa Danao.
Matud pa sa inahan ni Adriano sa interbyu sa TV Patrol Central Visayas nga nagkalibang nang daan ang anak apan nagtuo lang silang dinala ra kini sa pagngipon sa bata ug wala niya dad-a sa tambalanan.
Samtang ang kabahin sa kapin usa pa ka tuig nga namatay sa maong sakit wala pay kompirmasyon gikan sa mga tinugyanan sa panglawas kabahin niini.
Subay sa rekord sa Department of Health (DOH) nagsugod ang sakit nga kalibanga niadto pang Oktobre 26 diin ang mga residente sa Taytay, Taboc, Suba ug Camalig-bato maoy naapektahan. Sa unang buwan sa pag-igo niini usa pa ka gatos ang nasakit apan midaghan kini niadtong Nobiyembre 26 ug miabot og 230 ka mga hamtong ug mga bata, ug ning bag-o lang 101 niini ang nakapauli na sa ilang pinuy-anan. Ang provincial health officer nga si Dr. Cristina Giango mibutyag nga kagahapon gihimo ang pulong-pulong sa mga opisyal sa apektadong mga barangay ug gituki ang paglimpyo sa tinubdan sa ilang tubig.
Ang mga ginikanan dili gusto dad-on ilang mga anak sa tambalanan dinhi sa dakbayan tungod sa gastos gawas lang sa lima ka pasyenteng gibalhin sa Eversely Hospital ug Vicente Sotto Memorial Medical Center.
Si Kongresista Red Durano sa ikalimang distrito personal nga mibisita kagahapon sa Danao District Hospital aron pakisayran ang kakulangon sa mga tambal sa mga pasyente.
Samtang sa pakighinabi sa Banat News sa usa ka reliever nurse sa Danao District Hospital nga nagpailang si Grace mikumpirmar nga adunay namatay nga pasyente kagahapon sa kaadlawon apan wala kini mobutyag sa pangalan.
Dugang pa niini nga naglisod sila sa pag-atiman sa mga pasyente maong mikuha sila og mga volunteers. (BANATNEWS)