CEBU, Philippines - Ang kapolisan sa lungsod sa Balamban may nailhan nang mamumuno sa usa ka kanhi kagawad sa barangay sa maong lungsod kinsa gipunggotan sa liog ug gitusak pa sa mga bala ang lawas sa daplin sa sapa niadtong Biyernes sa hapon.
Si Chief Inspector Resty Santos, hepe sa Balamban Police Station nagkanayon nga may nailhan na silang mga suspetsado apan dili pa nila ikabutyag karon ang mga ngalan niini samtang ila pang gipanid-an.
Dugang pa ni Santos nga kapin sa lima ka tawo ang nagtinabangay sa pagputol sa ulo ug sa pagtusak og mga bala sa lawas ni kanhi kagawad Hemilicio “Hemi” Taburnal, 51, nga taga sitio Mantuyong, ug kasamtangang nagpuyo sa sitio Cabatbatan, barangay Bayon sa maong lungsod.
Matud pa ni Santos nga usa sa motibo nga ilang gisuta karon sa pagpatay sa biktima , mao ang pagka-asset niini sa gobyerno isip tigpaniid batok sa mga tigpananom og marijuana sa maong lungod.
Midugang si Santos nga niadtong kagawad pa sa barangay ang biktima, mao kini tigsumbong sa kapolisan sa mga tawong tigpananom og marijuana sa bukirang bahin sa lungsod.
Gani matud pa ni Santos nga nawagtang sa pagka-kagawad sa Mantuyong ang biktima kay giinitan kuno kini sa mga tawong gidudahan nilang tigpananom og marijuana sa maong lugar.
Hinuon miingon si Santos nga sa lima ka suspetsadong gi-surveilance nila karon, duha niini naluwatan na og warrant of arrest gumikan sa kasong pagpananom og marijuana. (BANATNEWS)