CEBU, Philippines - Gipanglantawan sa kadagkuan sa kapulisan sa lalawigan sa Sugbu nga hayan mokalma ang tensyon sa isyu sa pulitika diha sa lungsud sa Tudela isla sa Camotes, sa election sa sunod tuig subay sa pagsibog ni kanhi Mayor Demetrio Granada nga atbangan si incumbent mayor Rogelio Baquerfo.
Kini maoy gipadayag ni Sr. Supt. Jesus Gaquing, ang pangulo sa kapulisan sa lalawigan nga makapakalma gyud sa tensyon sa maong lungsod ang maong kalamboan sanglit kaniadto pa init na kaayo ang panagribal nila ni Granada ug Baquerfo. Kahinumduman nga sa milabay’ng eleksyon nagkinihaay ang duha tungod kay pulos nangangkong maoy midaog sa 2004 elections ug misangpot gyud nga nagpuli-puli sila og lingkod sa pagkamayor hangtud nga nagdungan gyud sila og lingkod apan managlahi og opisina ug mga empleyado niining tuiga. Butang nga nakapainit usab sa sitwasyon partikular na sa ilang tagsa-tagsa ka lunod-patay’ng mga suporter ug nakaapekto na sa batakang serbisyo ngadto sa mga tawong mibotar kanila. Mapasalamaton si Gaquing tungod kay dili na unya kinahanglanon ang dugang pwersang iyang gipadala sa maong lungsod nga nagbantay sa kahapsay ug kalinaw aron iya kining mabalhin sa ubang dapit diin kini kinahanglanon.
Gidugang niini karong mga panahuna wala nay mga sakop sa Special Reaction Units (SRU) sa Tudela nga gipaabag sa kapulisan sa lungsod.
Apan bisan paman sa maong kalamboan dili pa nila mawagtang sa listahan ang lungsod sa Tudela nga usa sa mga bantayanang lugar sa kapulisan panahon sa election. (Guam Logroño) (BANATNEWS)