CEBU, Philippines – Gihugawan si GSIS President ug General Manager Winston Garcia sa pagdumala ni Cebu City Mayor on-leave Tomas Osmeña sa siyudad sa Sugbu apan naluoy kang acting mayor Mike Rama tungod sa kadaghan sa insulto sa mayor.
Sa usa ka ambush interview sa DyRF, si Winston Garcia nagkanayon nga wala matarong pagdumala sa mayor ang siyudad sa Sugbu kay walay mga maayong mga proyekto kining nahimo.
Si Garcia miingon nga may nahuman na untang South Road Properties nga nahimo pinaagi sa pag-utang og dakong kantidad sa usa ka international nga bangko apan hinay usab kaayo ang development niini.
Gani, gihulagway ni Garcia nga ang siyudad sa Sugbu nangiwit na sa natad sa development ug naapsan pa gani sa kagamhanan sa lalawigan sa Sugbu. Iyang gitataw nga mauwaw siya sa pagdapit og mga bisita ug abi-abihon dinhi sa siyudad sa Sugbu tungod kay walay angayang ikapasigarbong development.
Siya nagkanayon nga nagkinahanglan ang Sugbu og marunong ug makamaong mayor nga makahatag og mga kalambuan sa siyudad.
Nagdumili hinuon sa pagtumbok ni Winston Garcia nga may tinguha usab siya pagdagan sa pagkamayor sa siyudad sa Sugbu pinaagi sa pag-ingon nga paabuton lamang unya niini ang tukmang panahon kun molansar ba kini ug dili.
Samtang gipadayag ni Winston Garcia ang iyang labihang kaluoy ngadto sa iyang suod nga classmate nga si acting mayor Mike Rama tungod kay nagpura na lang kini og tulon sa mga insulto ug kasaba sa mayor.
Tungod lang sa tinguha ni Rama nga i-endorsar nga kandidato sa pagkamayor sa Bando Osmeña Pundok Kauswagan sa umaabot nga election. Matud pa ni Garcia nga siya maoy nauwaw kang Rama nga usa ka abogado apan walay nahimo sa mga pasangil ug batikos sa mayor ug mihulagway niining daw nawad-an og dignidad si Rama sa iyang kaugalingon kay nahisama ra kini sa usa ka political leader nga walay baruganan. – Chester Abadilla (BANAT NEWS)