CEBU, Philippines - Bisan pa man sa pagpahibawo sa FBMA Marine Inc. ang tiggama og mga fastcraft nga manangtang kini og 73 ka mga empleyado tungod sa epekto krisis sa tibuok kalibutan, si Governor Gwendolyn Garcia mitumbok nga ang shipbuilding industry dinhi sa Sugbu nagpadayong malambuon ug wala matibugsok sa krisis karon.
Apan si Balamban Mayor Alex Binghay sa iyang bahin nabalakang mogamay unya ang koleksyon nila sa buhisan sa maong kumpanya karong tuiga ug hangtud nga dili mabalik sa normal ang operasyon sa maong industriya.
Si Garcia nagkanayon nga gawas sa FBMA naa pa gihapon ang labing dakong shipbuilding company sa Balamban nga mao ang Tsuneishi Ltd. Nga padayon pa sa ilang expansion taliwala sa ekonomikanhong krisis.
Gipasabot ni Garcia nga kagahapong adlawa iyang personal nga gitawagan ang presidente nga si Shinji Watadani aron pagsuta sa estado sa kompanya ug uban pang shipbuilding company.
Nasuta sa gobernador pinaagi ni Watadani nga ang Tsuneishi wala maapektahi sa krisis gani mopalapad pa kini sa operasyon tungod kay ilaha na usab buksan ang building dock nga makahimo og 580 mil ka metriko tonelada hangtud sa 180 mil ka metriko toneladang barko.
Gikalipay usab sa gobernador ang kasayuran gikan ni Watadani nga dili susama sa FBMA nga wala nay nadawat nga order, ang Tsuneishi may orders pa og mga dagkong barko gikan sa 20 ngadto sa 30 ka mga orders.
Tungod niini, gitataw sa gobernador nga masaligon siyang dili manaktak ang Tsuneishi og kapin sa 6 mil ka mga empleyado.
Samtang si Garcia miingon nga nipasalig siyang magpadayon ang supply sa kuryente alang sa maong kompanya aron dili maputol ang operasyon.
Nipasalig usab ang gobernadora nga tabangan ang 73 ka mga empleyadong matangtang gikan sa FBMA sugod karong sunod nga bulan. - Chester Abadilla (BANAT NEWS)