Priso may kasong rape naka-ikyas sa barili

CEBU, Philippines - Usa ka piniriso nga nag-atubang og kasong pagpanglugos naka-eskapo gikan sa detention cell sa kapolisan sa lungsod sa Barili samtang gibuwad silang mga piniriso sa init niadtong Domingo sa alas 9 sa buntag.

Ang naka-eskapo nga piniriso mao si Arnel Celetuna Ogaob, 20, ulitawo ug nagpuyo sa Sitio Napo, barangay Sta. Ana sakop sa maong lungsod.

Ang maong piniriso maoy usa sa tulo ka mga suspek sa pagpanglugos ug pagpatay sa duha ka mga minor de edad nga babaye nga nagpangidaron og 14 ug 4 anyos didto sa Sitio Napo, barangay Sta. Ana niadtong Agosto 15,   2004.

Matud ni PO3 Job Sarvida sa Barili Police Station sa dihang nahinabi sa Banat News subay sa blotter nga gibasehan niini ang maong piniriso nakahigayon sa pag-eskapo dihang nalipat niini silang mga polis nga nagbantay og duty niadtong higayona pinangulohan ni SPO4 Edward Villaester.

Matud ni PO3 Sarvida nga si Ogaob ug ang lain nilang duha ka piniriso nga sila si Cristopher Radigos nag-atubang og kasong illegal fishing ug Adolfo Tagacanao nga nag-atubang og kasong physical injuries   ilang gipainitan sa init nianang adlawa sa atubangan sa ilang prisohan human magluya sulod sa prisohan ang binilanggo nga si Radigos.

Apan gilipat ni Ogaob ang mga polis nga nag duty niadtong higayona ug nakahimo kini sa pag-eskapo nga wala usab motug-an ang iyang duha ka mga kauban nga piniriso.

Matud ni PO3 Sarvida nga si Ogaob niadtong hinapos nga bahin sa 2006 giturn-over sa National Bureau of Investigation (NBI-7) sa ilang kustodiya human kini gihimong state witness sa kasong pagpanglugos ug pagpatay batok sa iyang duha ka mga kauban nga suspek nga nabalhog na karon sa Cebu Provincial Detention and Rehabilitation Center (CPDRC) sa Kalunasan.

Ang kapolisan sa Barili padayong nagpahigayon og hot pursuit operation pagsikop og balik sa mi-eskapo nga piniriso. – BANAT NEWS