CEBU - Gitinuod gyud sa nagpailang whistleblower nga si Crisologo Saavedra ang iyang bahad sa usa ka komentarista ug manager sa DYHP-RMN Cebu pagpasaka niini og kasong libel.
Kagahapong adlawa personal nga gipadangat ug gisang-at ni Saavedra ang iyang reklamo ngadto sa City Prosecutor’s Office batok kang Atty. Ruphil Bañoc.
Wala na kaagwanta ang whistleblower sa iyang pagpaminaw sa mga komentaryo ni Bañoc sa tulumanon niining “Birada” matag alas 6:00-8:30 sa buntag.
“He calls me kawatan, tiguwang, giangoango madaut ang akong reputasyon ana personal kaayo,” sumala ni Saavedra sa dihang nahinabi sa DYHP human sa iyang pagsang-at sa kaso.
Gawas sa kasong libel nagplano usab si Saavedra nga mopadangat og laing reklamo ngadto sa Kapisanan ng mga Brodkaster ng Pilipinas (KBP).
Alang kang Saavedra dili maayong ehemplo si Bañoc ngadto sa mga sakop sa media dinhi sa Sugbu sa iyang pagka-komentarista.
Lakip sa gipasakaan og kasong libel ni Saavedra uban kang Bañoc mao ang iyang mga kanhi empleyado nga sila si Hilda Abante, Jocelyn Mabanto, Elviro Quita ug Iron Pono.
Ang upat una nang misang-at og kaso batok kang Saavedra ngadto sa National Labor Relations Commission (NLRC-7) tungod sa giingong dili makiangayon niining labor practice.
Apan matud ni Bañoc nga ang gihimong lakang ni Saavedra maoy klaro nga harassment ilabi na ngadto sa iyang mga kanhi empleyado.
Nasayran nga sila si Abante, Mabanto, Quita ug Pono nidangop sa DYHP-RMN Cebu ug nagpatabang sa sibyaanan sa gihimo ni Saavedra kanila.
Ang mga kanhi empleyado ni Saavedra sa iyang Essence Spa diha sa SM City Cebu giingong wala hatagi og igong suholan ug sa ubang benepisyo nga alang sa usa ka mamumuo.
Gani ang maong negosyo sa nagpailang whistleblower nasuta usab ni Bañoc nga walay business permit gikan sa Cebu City Hall.
Kini maoy giingon ni Bañoc nga iyang gihimo nga sumbanan sa iyang pagkomentaryo batok sa tawo nga nagpailang dunay krusada ug adbokasiya.
“Dihang si Saavedra nagpa-interview nato sa estasyon mahitungod sa iyang advocacy ato siyang gi-entertain unya ang iyang mga empleyado na karon maoy midangop nato nga klarong gilupigan dili nato atimanon?” matud ni Bañoc.
Gihangop hinuon sa abogadong komentarista ang kasong gipasaka ni Saavedra kaniya uban sa pagpadayag nga kini walay igong basehanan. – BANAT NEWS