CEBU - Gitinguha karon sa Sabrosa, Portugal, ang dapit nga natawhan ni Ferdinand Magellan, nga mahaduol ug makiglambigit sa dakbayan sa Sugbu.
Kini ang hinungdan nga ang mayor sa maong dapit nga si Jose Manuel Carvallo Marques gusto nga mamahimong sister city sa siyudad ang ilang lugar.
Niadtong miaging semana giduaw ni Marques ang Sugbu ug nihapit sa Magellan’s Cross uban sa pagkurtisiya kang acting Mayor Michael Rama.
Ubay-ubay nga mga butang ang gihatag ni Marques ngadto kang Rama isip handumanan sa pagduaw niini kaniya nga naglakip sa medalya ug uban pa.
Sa maong higayon gipadayag usab sa mayor sa Sabrosa ang ilang tinguha nga makigbayloay og cultural activities sa dakbayan sa Sugbu.
Niingon hinoon si Rama nga ila pang tun-an ang proposal ni Marques apan dako ang posibilidad nga dili makabalibad ang siyudad sa intensiyon sa Sabrosa.
Ang mayor sa Sabrosa nagtinguha karon pagpakiglambigit sa mga dapit nga nabisita ni Magellan nga naglakip sa Pilipinas partikular na sa Sugbu.
Segun sa kasaysayan, si Magellan naabot dinhi sa nasud niadtong Marso 16, 1521 apan walay swerte kay ang Portuguese conqueror wala na makabalik nga buhi sa ilang lugar.
Kini tungod kay si Magellan ug kaubanan napukan sa grupo ni Lapu-Lapu diha sa isla sa Mactan atol sa ilang panagsangka liboan ka tuig na ang nakalabay.
Gawas sa Sabrosa, ang siyudad sa Barcelona sa kasikbit nga nasud sa Portugal nga mao ang Espanya nagtinguha usab nga mamahimong sister city sa dakbayan sa Sugbu.
Apan kini wala pa kaaprobahi sa konseho sa siyudad nga maoy magpalig-on unya sa relasyon sa duha ka dakbayan.
Sa nasayran, ang siyudad sa Sugbu duna karoy kapin sa napulo ka sister city diin ang labing aktibo niini giingong mao ang Haarlemmermeer didto sa Netherlands.
Ang Haarlemmermeer gipasigarbo sa dakbayan tungod kay kini giingong daghan na og nahatag nga mga donasyon sa siyudad partikular na sa Cebu City Medical Center (CCMCC) ug sa Emergency Rescue Unit Foundation (ERUF). (BANAT NEWS)