Mokabat sa 500 mil ka pesos ang danyos sa lima ka balay nga naugdaw didto sa Sitio Kawayan, Brgy. Gun-ob dakbayan sa Lapulapu kagahapon sa udto.
Sa imbestigasyon ni FO2 Julius Gujar sa Lapulapu City fire department nasayran nga didto nagsugod ang kalayo sa ikaduhang andana sa panimalay ni Alma Yorong ug dali kini nga mikatap sa mga kasikbit nga panimalay.
Lakip sa naugdaw mao ang panimalay ni Antonio Tindon, Eduardo Booc, Cerapion Comita, Francisco Igot ug ang gipaabangang mga lawak ni Alma Yorong.
Atol sa maong sunog walay gikataho nga naangol o nasamdan, apan usa sa problema nga nasugatan sa mga bombero mao ang gilay-on sa naapektuhang panimalay nga diin ila nalang gisumpaysumpay ang ilang mga hose padung sa dapit nga nasunogan gumikan kay dili makasulod ang ilang mga fire trucks.
Matud pa ni Gujar nga usa ka electrical short circuit ang hinungdan sa pagkasunog sa mga panimalay human nga ang TV mibuto diin posibleng wala kini maibot sa iyang outlet ug mi-overheat.
Nadawat sa kabomberohan ang sunog mga 11:15 kagahapon sa udto ug gipaubos kini sa 3rd alarm ug nakontrolar kini sud lamang sa 5 ka minutos sa dihang miresponde ang kabomberohan.