Pakyas ang tinguha sa usa ka tawong namaligya og armas sa Lapulapu human kini gipadakop sa polis sa iyang gibaligyaan kagahapon sa kaadlawon.
Ang nasikop mao si Vicente Lavador Manco, 28, lumad sa Mantija, Danao ug kasamtangang nagpuyo sa Sitio Caimitohan, Basak, Lapulapu.
Nakuha sa posesyon ni Manco ang usa ka kalibre .45 ug usa ka magazine atol sa paghiling sa kapolisan nga miresponde sa maong alarma.
Matud pa ni PO3 William Homoc usa sa nakadakop ni Manco nga gikan siya sa ospital ug igo lamang siya miresponde sa ‘armed person alarm’ sa dalan Punta Rizal, Pajo, Lapulapu ug positibong nakuha gikan ni Manco ang mga ebidensiya.
Sa nasayran sa Banat News, si Manco namaligya sa maong armas duol sa usa ka bikini bar sa Punta Rizal sa Pajo ug gumikan kay wala makauyon ang iyang gibaligyaan sa armas nanawag kini sa kapolisan hinungdan sa pagka-alarma niini ug pagresponde sa mobile patrol uban ni PO2 Jumar Ybañez.
Matud pa ni PO3 Homoc, pasakaan og kasong kalapasan sa Akta Republika 8294 ug kalapasan sa Comelec gun ban si Manco samtang nabilanggo kini sa detention cell sa kapolisan sa Lapulapu