P90 mil nadala sa kawatan

Mikabat sa P90 mil ang kantidad sa mga alahas ug butang nga nadala sa wala mailhing kawatan niadtong Martes sa hapon gikan sa usa ka residente diha sa Camella Homes Barangay Lawaan I, dakbayan sa Talisay.

Si Melpa Lim, 41-anyos, residente sa maong lugar ang mitaho sa kapolisan sa siyudad kabahin sa maong hitabo.

Base sa imbestigasyon sa mga polis nga wala diha sa iyang balay si Lim dihang nahitabo ang insidente.

Ang suspetsado misaka diha sa atop sa bakanteng balay tupad sa balay ni Lim ug dayon milukso kini diha paingon sa pultahan sa kusina sa balay sa biktima.

Giligwatan sa maong kawatan og kabilya ang door knob sa pultahan sa kusina ni Lim maong nakasulod kini sa balay.

Nadala sa kawatan ang mga alahas ni Lim nga mikabat tanan og P50 mil, Gucci wrist watch P25 mil, Olympia camera P10 mil ug Nokia 6050 nga cellular phone P5 mil.

Base sa talaan sa kapolisan gikan sa tuig 2006 hangtud niining tuiga mikabat na sa P1 milyones ang danyos sa insidente sa mga kawat ug lungkab sa siyudad.

Kasagaran sa maong insidente wala pa kini masulbad ug padayon pa nga nagpahigyon og follow-up ang mga polis sa siyudad.