Si Alfredo Anuba,46, nga taga Sambag Uno apan sa Kalubihan nagserbisyo isip tanod gipusil patay sa suspek nga si Nilo dela Cerna,34, nga taga dalan V.Rama sa Calamba.
Ang biktima gipusil tungod lang sa panagbingkil sa duha sanglit gikatahong bugaw sa mga babayeng nagbaligya og dungog ang suspek ug makadaghan nang higayon nga nakatrokis sa biktima.
Ang suspek sa unang pakighinabi sa Banat News nangangkong wala siya malambigit sa mga iligal nga kalihukan ug nagnegosyo ra siya og mga ukay-ukay nga iyang i-buy and sell.
Atubangan sa iyang asawa ug anak ang biktima gipusil makausa sa dughan sa suspek gamit ang usa ka kalibre 357 rebolber ug dihang midagan ang samarang biktima gigukod kini sa suspek ug giusban og pusil sa ulo hinungdan sa hinanali niining kamatayon.
Matud pa ni Labra nga gawas sa pagkatanod sa Kalubihan ni Anuba, sakop usab kini sa Barangay Intelligence Network nga miabag sa kalinaw sa dakbayan.
Dunay hinabang pinansyal nga ihatag ang CIIB pinaagi sa organisasyon sa BIN ngadto sa kabanay ni Anuba.
Kagahapon, gipasakaan na og kasong murder sa Homicide Section ang suspek ngadto sa piskalya.