Si Virginia Miano, inahan ni Al Quirante miduol kagahapon ni Garcia atol sa pagbisita sa gobernador sa Asturias ug personal nga gipaabot niini ang maong yangungo.
Si Virginia mibutyag kagahapon sa mga tigbalita nga niadtong Martes gipadamgo siya sa iyang anak ug nangayo kini og pagkaon sa iyang damgo tungod kay gigutom kini.
Sa damgo usab ni Virginia giingnan niya ang iyang anak nga mopauli apan mibalibad kini tungod kay aduna kini kuyog nga laing usa usab ka bata.
Laing gihangyo ni Virginia nga mapadala sa Asturias ang patay'ng lawas sa iyang anak aron masud-ong nila kini sa katapusang higayon.
Niadtong Domingo napalgan ang patay'ng lawas ni Al Quirante nga gisulod og sako ug ang pamilyang Miano milarga paingon sa Bantayan aron makita ang patay'ng lawas sa ilang anak apan wala sila makatan-aw niini tungod kay dili na masingo ang baho niini.
Ang patay'ng lawas gisulod dayon sa lungon lakip na ang sako nga gisudlan niini ug gilubong.
Gibutyag ni Virginia nga gihatagan sila og P500 ni Mayor Letecia Orosco aron iplete paingon sa Bantayan.
Si Virginia nangandoy nga madugta sa prisohan ang 16-anyos nga suspetsado.
Gihimakak ni Virginia ang pasangil sa suspetsado nga gisugo niya ang iyang anak sa pagkawat sa P70 nga kwarta sa suspetsado aron iduwa niya og tong-its ug maoy hinungdan nga gipatay sa suspetsado ang iyang anak. Gihimakak usab ni Virginia nga kahibalo siyang moduwa og tong-its.
Sa laing bahin, si Garcia nagkanayon nga gitawgan na ang National Bureau of Investigation (NBI) aron moayuda sa pagpa-exhume sa patay'ng lawas sa biktima ug ang Department of Social Welfare and Development (DSWD) sa probinsiya mihatag usab sa ilang ayuda.
Ang kagamhanan sa probinsiya sa Sugbo maoy moabaga sa galastohan sa pagpakubkub pag-usab sa patay'ng lawas sa biktima. Kagahapon gitunol sa kagamhanan sa probinsiya ang hinabang nga P5 mil nga salapi ug usa ka sakong bugas sa pamilyang Miano.